昨天早上，我碌電話，赫然看到玄彬的新聞。
「老婆，玄彬和孫藝珍拍拖呀！」
係老婆心中，有個男神排名榜：
第1位理所當然係呀仔，第2位玄彬，第3位金秀賢，第4位姜濤，我近來已被擠到第5位……
不過，能夠緊隨姜B 之後，我又覺得好自豪。
聽聞男神2號情有所歸，老婆心緒不寧地說：
「都尚未證實，傳聞嚟嘅啫！」
未幾，經理人公司確定傳聞屬實，我掩飾心中的狂喜，故作戚容地說：
「唉，老婆，無論你點高攀，人家始終唔接受你，死心吧。」
只見她目光一閃，然後幽幽地道：
「玄彬揀孫藝珍係好合理的……老公，你唔覺得咩？孫藝珍輪廓同我有幾分相似，玄彬見我已嫁咗，惟有搵個似我的人。他心中，有苦說不出……」
我立即敗走，完全覺得自取其辱。
到了晚上，姜濤拿下多個獎項。
見他一臉愕然，唱歌時略有微瑕，老婆頓生無限憐愛。
「姜濤講嘢好謙遜，份人好真，抵我咁鍾意。」
多得兩人，讓香港一眾女性有無限的渠道可傾注情意。
要成熟型格的，可仰而慕玄彬；
要率真可愛的，可俯而愛姜濤。
至於敬陪榜末的我，會更加俾心機工作，
好讓老婆每晚更能欣賞男神們的一切而無後顧之憂！
Search